Ayodhya-a Ram Temple sakna tura Temple Trust-ten India rama Hindu te hnen atanga thawhlawm a khawn chu kal zelin, tunah hian cheng vaibel-chhe 600 chuang an inkhawn ngah tawh a ni.
Tunah hian Abhishek Agrawal, chatered accountant chu hemi buaipuitu hotu ber niin, an pawisa thawhkhawm hi a him ngei a ni tih hriatna turin chhawng thumin hma an la a. Digital app, online monitoring leh unique ID te an siam tih a sawi.
Shri Ram Janmabhoo-mi Teerth Kshetra Trust chuan Ayodhya-a Ram Temple sakna tur hian India ram hmun hrang hrangah January ni 15 atang khan pawisa a khawn tan a. Pawisa khawn hna hi Vishwa Hindu Parishad (VHP) member-ten mahni inpein an thawk a. Tun thla ni 27 thleng han an khawn zel dawn a ni.
Tarlan tawh angin hemi atan hian coupon siam a ni a. Rs 10, Rs 100 leh Rs 1,000 coupon siamin, pawisa thawh turte hian he coupon hi an neih ang zat an lei mai a. Cheng 2000 leh a chunglam thawhte erawh PAN card hamnga chhinchhiah an ni.
Ram Temple Trust hian an fund lak khawm dahna atan hian Bank pathum - State Bank of India, Punjab National Bank leh Bank of Baroda te an hmang a. Hengah te hian a duh chuan pawisa an transfer mai bawk a, an thawh hnem tawh hle a ni.
Comments
Post a Comment