Union Home Ministry chuan nimin (17.12.2020) khan West Bengal-a IPS officer pathum chu Central sorkar -ah deputation-a thawk turin thupek a chhuah.
Heng IPS officert-te hi BJP President JP Nadda convoy beih a nih tuma duty-te kha an ni a. MHA chuan an thupêkah heng police officer pathum te hian IPS Cadre Rule 6(1) an bawhchhia a, an duty an ngaihsak tawk lo niin a hria a, Central-ah deputation-in a dah tih a tarlang.
MHA thuchhuahin a tarlan danin Bholanath Pandey chu Bureau of Police Research and Development-ah kum 4 chhung SP ni turin ruat a ni a, Praveen Tripathi chu Sashastra Seema Bal-ah kum nga chhung DIG ni turin dah a ni a; Rajeev Mishra pawh Indo-Tibetan Border Police-ah kum nga chhung IG hna thawk tura dah a ni bawk.
He thupek hi Ministry of Home Affairs chuan nimin khan West Bengal DGP hnenah a thawn a. Pandey hi SP, Diamond Harbour ni lai a ni a, Rajeev Mishra hi ADG, South Bengal ni lai niin, Praveen Tripathi hi DIG, Presidency Range ni lai a ni bawk.
West Bengal CM Mamata Banerjee chuan sorkar laipui chu IPS-te inenkawlna dan hmang sualah a puh a, state sorkar remtihna tel lovin hma a la a, state thuneihnaa inrawlhna lian tak a ni a ti a. West Bengal sorkar chuan Nadda thubuai hi a ching fel daih tawh niin a sawi bawk a ni.
Comments
Post a Comment