India hi Cricket khawvelah chuan ram ropui tak a ni a. International Cricket Council -a India pawimawhna te, Board of Cricket Control in India (BCCI) President nih chakawm zia te pawh nakinah a tul chuan kan la sawi mahna. Chutiang chu a nih a, India chu Cricket khel thin ram pawimawh a nih lai leh, Cricket record bu hrang hranga India cricketer-te hming a tlar tuarh lai hian; India ram hian cricket-a vawm kawh na thei (fast bowler/pacer) a nei tha ngai miah lo thung a. Chuvangin, tun tuma pacer te kan sawi tur pawh hi in rin loh lam a lo ni maithei.
Kum 75 liamta chhung khan Indian bowler-ten wicket an lak zaa 20 chauh fast bowler-ten an lak a ni a. Mahse, tun hnai kum 4 chhunga India wicket zaa 60 zet chu fast bowler-te lak a ni ta thung a. Sawi lansarh an phu ve a ni.
Tun hnaia Indian bowler zinga hlauhawm ber ber pali te chu - Jasprit Bumrah, Mohammed Shami, Umesh Yadav leh Ishant Sharma te an ni a. He mite hi tunlaia India cricket ralthuam hlauhawm palite ti ila a dik hial ang. An chanchin tlangpui - an thiante sawi a ni zawk mah - i lo thlir thuak thuak teh ang.
1. Jasprit Bumrah: ‘The friendly superstar’ an ti. West Indies legends Malcom Marshall, Joel Garner leh Curtly Ambrose-te tih lohah chuan 1970 chho atanga chhutin Bumrah aia bowling average nei tha hi an awm lo a. Indian fast bowler zing a tha ber ti-a sawi ngam a ni hial.
Kum 27 mi Bumrah hian India ram tan a khelh hmain Indian Premier League-ah hming a chher hmasa a. Pawisa pawh a maka maktaduai tel a hlawh hman a. Mumbai Indians tan star a nih fe hnuah India ram tan Test cricket a khel ve chauh a ni.
India batsman hlui Suresh Raina chuan, “Virat (India captain Virat Kohli) hian Bumrah hi a a duh takzet a. Harsatna a neih apiangin Bumrah hnenah hian ball a pe a ni tawp mai,” a ti.
Bumrah hi white ball cricket atanga inzir niin, Test cricket a khelh hnuah pawh a ball vawm hi a dik em em mai a. Eng zawng pawhin a vawm swing thiam ve ve a. An in bul hmun zim ve taka ball vawm zir thin a nih avangin pacer dang anga tlan thui vak a mamawh lo va. A ban vai a rang a, a ke chheh a dik a, a taksa dah dan a dik bawk an ti a. Tlan vak lovin darkar khata mel 90 zeta chakin ball a vawm fur fur thei a ni.
Abishek Jhunjhunwala, IPL-a amah hmachhawntu hmasa zinga mi chuan Bumrah an hmuh tir chuan Bumrah hi, “He pa hi tunge, a style hi a va mak ve? Engtin nge Mumbai Indians hian an lak ngawt theih le? kan ti vek,” a ti a. Hei hian Bumrah style danglamzia a lantir awm e.
Fast bowler tam zawk hi chu ri fua fua mai, field chhungah phei chuan thinrim emaw tih tur an ni deuh thin a. Bumrah erawh chutiang chu a ni ve lo. A nui sang reng mai !
Raina chuan, “Ka khelh pui tawh zinga pa tha ber pawl a ni. Fast bowler dangte angin a celebrate ve vak ngai hek lo, a chezia hi a dai raih reng mai a ni,” a ti.
2. Mohammed Shami: ‘The Sleepy One’ an ti. Ani hi Test cricket-ah over khata wicket 5 la thei a ni a, India bowler zingah kum li chhungin hetiang ti thei hi an awm lo.
Kum 30 mi a ni tawh a, chuti chung chuan a taksa fit nan exer lak a hrat tehchiam lo an ti! Bengal taka cricket a khelhpui thin leh first-class cricket a khelh tira a room-mate Jhunjhunwala chuan, “Ei duh, mut duh bawk si a ni,” a ti a. “Kan inkhelh loh lai chuan Bengal player dang te chuan thildang kan ti a. Ani chu a rawn kal ve ngai lo. Cricket kan khel lo a nih chuan ni khatah darkar 18 te a mu thin a. A thiam si a, a fitness hi kan veipui thin. A awmdan thlak se chuan India tan a khel hrim hrim ang kan ti thin,” a ti.
2012-13 ah India ram chhunga inelna hrang hrangah a che tha a, 2013 January thla khan India ram tana ODI khel tura koh a ni a, hemi kum kum tawp hian Test khel tura thlan a ni leh bawk.
India ram tana a khelh hnu hian tlem chuan a thothang a tha ve ta deuh a, mahse, a la ngawichawi zui zel a. “Batsman te hi nawr ve deuh rawh, pawr ve deuh rawh kan ti thin. Dressing room-ah pawh a la ngawichawi zel,” Jhunjhunwala chuan a ti.
3. Umesh Yadav: Kum 33 mi Umesh hi Bumrah, Shami leh Ishant-te awm loh changa India tana khel tura koh ve ang lek a ni naa, a palian a, a vawm na a, batsmen-ten an hlau hle.
School a zawh hnuah Police nih tumin a bei a, a hlawhchham hlauh. Kum 21 a nihin Madhya Pradesh tan Ranji Trophy a khel a. Hemi tum hian mi pakhat helmet a vawm khi phawk! Hemi tuma an khelhpuite chuan, “He pa hi tunge? West Indies bowler kan hmachhawn a ni ringawt alawm le..” an ti! First-class cricket a khelh hmasak berah wicket 4 a la a, run 72 chiah a pe bawk a. Tunah hian India tan Test-ah wicket 148 a la tawh.
4. Ishant Sharma: Anni pali zingah hian a sang ber a. India tan Test-ah wicket 297 a la tawh a, Kapil Dev leh Zaheer Khan-te huang a lut ve thei tep. 2018 khan Sussex-ah khelin, England club cricket boruak te pawh a zuk hip tawh.
Ishant hi fiamthu duh, a bula awm nuam tak a ni a. England-ah, Ian Bell-te nen pawh lo khel tawh a nih avangin India camp-ah chuan zah a phur angreng viau. India tan Test match vawi 97 khel tawh a ni a, vawi za a hnaih. Vawi 100 a khel tling a nih chuan India ramin fast bowler Test match vawi 100 khel tling thei a neih hmasak ber a ni dawn a. Tunah kum 32 mi a ni. Ishant hian Test match vawi 100 a khel tling a nih ngat chuan, midangte pawh hian an rawn khel vat ngei ang.
Comments
Post a Comment