Farm Law duh lova nuar mek zinga mi, Jind, Haryana-a awm pakhat chu Tikri border atanga hla lo te, KM hnih emaw velah thingah a lo inawk hlim tih nimin khan an sawi.
PTI-in a tarlan danin, police-te chuan he pa hi kum 52 mi niin, a thih hmain lehkha a ziak tih an sawi a. Mahse, hei hi a dik chiah em tih finfiah a la ngai tih an sawi a. Bahadurgarh City police station SHO Vijay Kumar chuan, “He loneitu hi a hming chu Karamveer Singh a ni a, Jind khuaa cheng a ni. Park-a thingah a inkhai hmuh a ni a. Tikri border atanga kilometer hnih vela hlaah a inawk hlum a ni,” tiin a report a ni.
Singh hian a lehkha hnutchhiahah chuan, “Loneitu unaute u, Modi-a sorkar hian ni min tiam sawn char char a, he farm law rapthlak tak hi tuman hlih emaw, hnuh kir emaw a nih hun tur hi an hre lo a ni,” tih a ziak an ti.
Hetianga loneitu intih hlum hi a vawi khat thlenna a ni lo a. Kar hnih-thum liamta mai khan Haryana loneitu pakhat pawhin tur a ei a, ani pawh hi Tikri border-a nuar zinga mi tho a ni a. A tur ei avang hian a thi nghal lo va, mahse, Delhi-ah enkawl a nih hnuah a thi a. Hemi hma, nikum december-ah pawh khan Punjab lam loneitu chu tur ei ni ngeia hriat a ni a, a thi bawk a ni.
Hemi hma hian Singhu border-ah Sant Ram Singh, Sikh thuhriltu pakhat pawh a intihum a, ani hi inti hlum zinga langsar ber a la ni nghe nghe.
Nikum November thla atang khan Delhi khawpui chhehvelah loneitute chu kal khawmin, loneitute tana Parliament-in dan a siam thar pathum - Farmers' Produce Trade and Commerce (Promotion and Facilitation) Act, 2020, the Farmers (Empowerment and Protection) Agreement on Price Assurance and Farm Services Act, 2020 leh the Essential Commodities (Amendment) Act, 2020 te chu duh lovin, hnuh kir emaw, hlih emaw ngiatin nawrhna an huaihawt a, tun hi an thleng a ni.
Comments
Post a Comment