Ayodhya-a Ram Tem-ple sak tur chu India ram chhunga Hindu-te pawisa thawh khawm hmanga sak tum a ni.
Shri Ram Janmbhoomi Teerth Shetra Trust chuan he temple, mipuite pawisa thawh khawm atanga sak an tum thu hi an puang a. Trust General Secretary Champat Rai chuan thawhlawm hi India ram pawn atanga pek a nih theih nan phalna an hmu thei lo a, ram dang atangin thawhlawm an khawn dawn lo tih a sawi a ni.
Champat Rai chuan hun rei lo teah Temple sakna tura sum thawh a nih theih nan India ram hmun hrang hrangah campaign an nei dawn tih a sawi a. Hei hi ‘Shri Ram Mandir Nidhi Samarpan’ tih a ni ang a. Nakkum January ni 15 atanga February ni 2 chhungin campaign an nei dawn a. Bhagwan Sri Rama pianna hmun, Ayodhya-a temple sak hna thawh nan hian Ram zuitute zawng zawngin pawisa an thawh duh ngei an beisei thu a sawi bawk.
Rai chuan, “He campaign nei tur hian Vishva Hindu Parishad (VHP) volunteer-te chu in tinah lutin, anni hi puithiam-ten an tawiawm ang a, mipuite hnenah Temple sakna atana sum thawh a ngaih thu an hrilh dawn a. He hun hi Makar Sankranti (January 15, 2021) atanga Magh-Purnima (February ni 17) inkar chhungin neih a ni ang a. VHP volunteer-te hian India rama khaw nuai 4 a chhungkaw maktaduai 110 te an tlawh chhuak dawn a ni,” a ti.
He campaign chhung hian temple sak tur hlimthla (model picture) hi in tinah sem a ni dawn a.. Rai chuan, “Lord Ram zuitute hian thawhlawm an thawh theihna turin Rs 10, Rs 100 leh Rs. 1000 thawh theihna coupon siam a ni ang,” a ti bawk.
Trust chuan Rs 10 coupon hi vaibelchhe 4 an print a, Rs 100 thawh theih na coupon hi vaibelchhe 8 siamin, Rs 1000 thawh theihna coupon hi nuai 12 an siam bawk a ni.
Rai chuan temple sak nan hian pawisa ngai zat sawi a la awm lo va, thawhlawm pawh hi beisei zat an nei lo tih a sawi bawk.
Comments
Post a Comment