Taylor Swift chuan a hla hlui a record thar leh hlawm tur zinga pakhat, kum 2008 a a tihchhuah hla hit em em ‘Love Story’ chu a clip tawi te a share zeuh.
He clip hi a thian, lemchan thiam Ryan Reynolds-a siam dating app advert-ah a ni a. A share atanga a lan dan chuan a hla hi a tidanglam tehchiam lo a, a music tlem tlem a tidanglam ni maiin a hriat a ni.
Swift hian a album hmasa paruk, music mogul Scooter Braun-a hnena copyright a lo hralh tawh chu a lei let leh tawh a. Hemi hnu hian a hla hit zual, a album hmasa lama mite chu ama duh dan taka record thar leh a tum tih a lo sawu tawh a ni.
Swift chuan tuna an record thar hi an la zo lo nasa tih sawiin, a thawh erawh an thawk rim hle niin a sawi a ni.
Fan tam tak chuan hetianga hla hlui, a satu ngai rengin record thar leh hi a hla original hlutna tichhetu mai mai ni turah an ngai a, tha an tih loh thu an sawi a. Mahse, a hla hit zinga lar ber pawl ‘Love Story’ a record tharah hian Swift hian a titha thawkhat hle niin tuna lo ngaithla leh tawhtute chuan an sawi a. A hmaa rimawi an hman aiin a guitar an tizawi a, a hmaa ri zawi violin kha a hma aiin a ring zawk a; chutih lai chuan ngun taka ngaihthlak loh chuan a danglamna hi hriat mai a harsa niin sawi a ni a. Kum 19 mi a nih lai, kum 12 lai liamtaa a awm nen khan a record thar a aw hi a la danglam mang lo an ti bawk.
Hetianga Swift-in a hla hlui record thar a tum lehna chhan hi Braun hian a hla master zawng zawng hi investment firm pakhat hnenah dollar maktaduai 300 vel zetin a hralhsak niin a sawi a. Chuvangin amah ngeiin a rimawi chu ama ta ngei a ni a, tuman an hralh tawh lohna turin a master amah ngeiin a kawl theih nan a record tha leh dawn ta a ni ber mai a ni.
Braun hian Swift nena an buaina hi mipui hriatah a sawi tha duh lo va. Mahse, nikum khan Variety chanchinbu hnenah amah leh a chhungte chuan thaha vauna an tawk niin a sawi a ni.
A album paruka hla te hi Swift hian co-writer nihna a neih avangin a tihchhuah leh theihna danah thuneihna a la nei ve tlat thung a. Mahse, a masters erawh a ta ni tawh lo va. A hlate chu TV fakna leh film vela hman a phal lova, a hlawkna chu Braun-an an chan vek dawn vang a ni a. Hetianga a record thar leh ho hi chu amah ngeiin a siam, a publish leh a zawrh chhuah a ni dawn a, ama tak pumhlum niin, a thu lovin vawrh darh a hralh theih a ni tawh dawn lo tihna a ni e.
Comments
Post a Comment