Lok Sabha Speaker Om Birla chuan Inrinni khan Prime Minister Narendra Modi chuan tun thla ni 10 khan Parliament building sak thar nana lungphum a phum dawn.
He Parliament building thar hi Central Vista redevelopment project peng pakhat hnuaia kalpui tur a ni dawn a. Building thar hi 64,500 sq meters zet awh tur a ni a. Tuna Parliament House, British hovin kum 93 liamtaa an sak tawh chu a thlak dawn a ni.
Speaker Om Birla chuan, “Building hlui hmang hian India ram chuan mahnia ro inrelna bul kan tan a. Kum 75-naah erawh chuan Parliament In hnih session chu building tharah kan nei tawh dawn a ni. He building hi lung leh hmanraw dang hmanga sak a ni satliah dawn lo va, India rama mihring vaibelchhe 130 zette suangtuahna tihpuitlinna a ni dawn a ni,” a ti.
Parliament building thar hi Tata Projects Ltd-in a sak hna an thawk dawn a. A design hi HPC Design, Planning and Management Pvt. Ltd in an buaipui a ni thung.
PM Modi chuan December ni 10 chawhnun dar 1-ah a lungphum phumin, hna tan a ni dawn a. Kum 2022-ah sak zawh beisei a ni a. A sak nan hian cheng vaibelchhe 971 ruahman a ni.
Parliament building tharah hian luhka paruk awmin, President leh Prime Minister-te luhna bik, Lok Sabha Speaker luhna bik, Rajya Sabha Chairperson luhna bik leh MP-te luhna bik, ni bika a huhova luhna tur leh mipuite tana luhna bik a awm hrang vek dawn a ni.
Parliament building thar hi chhawng li-a sang a ni dawn a. Lower ground, upper ground, first leh second floor a ni ang a. Lok Sabha chamber-ah seat 888 a awm ang a. Rajya Sabha chamber-ah seat 384 awmin, he building hi lirnghing laka him ngei tura duan lawk sa a ni dawn bawk a ni.
Comments
Post a Comment