South film star ropui Rajinikanth chuan December ni 31 hian political party a din thar chu a puang dawn a. Kum 2021 January thla atangin a party chu a nung tan dawn tih a sawi.
Tamil Superstar hian Twitter-ah he thu hi a ziak a. “Political party chu January thla atangin a piang dawn a, December ni 31-ah puan a ni ang,” a ti.
Tun hnaiah Rajini Makkal Mandram (RMM) pawl hotute (OB) leh Rajinikanth te hi ngun taka titihovin party chungchang hi an sawiho a. Politics chungchanga ruahmanna a neih te chu Rajinikanth hian puan chian thuai a tum tih a sawi ta a ni.
RMM-a district secretary-te pawh kawmin Rajinikanth chuan, “An ngaihdan an sawi a, kei pawhin ka ngaihdan ka sawi ve bawk a. Ka ngaihdan chu eng pawh ni se ka lamah an tang dawn tih min hrilh a ni. Ka ngaihdan hi a rang thei ang berin ka siam dawn a ni,” a ti a ni.
Tamil Nadu-ah hian nakkum April leh May thla chhung hian Assembly election neih a ni dawn a. Rajinikanth hian 2016 khan US-ah a kal a thlâk a, chu chu politics a khelh loh chhan niin a sawi thin a. Kumin March thla pawh khan politics luh chilh a tum loh thu sawiin, kum 1996 khan Chief Minister nih theihna chance a nei a, kum 45 mi chauh a la ni a, mahse, a duh lo va. ‘Tun ataka politics ka luh chilh leh te chuan mi a (a fool) ka ni mai dawn asin,” tiin a lo sawi tawh a ni.
Comments
Post a Comment