West Bromwich Albion boss Sam Allardyce chuan Arsenal chu Premier League atanga tlak thlak loh tuma an elpui tur (relegation rival) ni-a a ngaih thu a sawi.
Arsenal hi Premier League-ah 15-na ni mekin, relegation zone atangin point li chiahin an hla tawh a. West Brom hi 19-na niin, Mikel Arteta enkawl Arsenal ai hian point sarihin an hniam zawk a ni.
Allardyce chuan, "A hniam pariat zinga an awm chuan kan elpui tur an ni," a ti.
Thawhlehni zan khan Arsenal hi Carabao Cup-ah Manchester City chuan 4-1 in an hneh a. Hemi chungchang hi sawiin Big Sam chuan, "Premier League a ni lo naa, Man City-in an hneh hian Arsenal player-te inrintawkna a tichhe ngawt ang. Keini pawh kan ni ang.
"Engin nge delh a, eng vanga heti khawpa hniam nge an nih tihte an ngaihtuah nasa ang a, an dinhmun atanga tal chhuah dan an ngaihtuah ang," a ti a. January ni 2-a Arsenal nen an intum tur chungchang sawiin, "Arsenal lo do let turin ka player-te fuih phur ka tum ang," tiin, "Kan nawr na thei ngei ang, a chhan chu inrintawkna an tlakchham lai tak a ni. Hneh ngei kan tum dawn a, a hniam pariat zinga mi chu tute pawh hneh thei kan ni," a ti bawk.
Comments
Post a Comment